bega

CA DOCE

Si doppo vint’anne
ste vocche assieme
dicene ancora sì,
vò dicere
ca doce so state
ll’ore dell’ammore;
ca doce so state
‘e juorne, ‘e mise e ll’anne;
ca doce doce
nce simme accumpagnate
mano e mano.

Vò dicere
ca doce so state
pure ‘e lacreme chiagnute;
ca doce so state
pure ‘e pene suppurtate,
si doppo vint’anne
ste vocche assieme
dicene ancora sì.

BEGA - 22 agosto 1991 -
Primo classificato Giuria Critica al Concorso di poesia
PAROLE E SGUARDI D'AMORE SPRECATI 5/06/2006 by NATRUSSO COMMUNICATION

NATALE

Na stella lucente nce dice ch’è nato.
C’ ‘a stella che splenne s’allummene ‘e case.
‘A luce che abbaglia d’ammore nce parla.
‘O fuoco d’ammore ‘nce dà tanta pace.
‘A pace allicorda che pace è perdono.
Perdono è nu ciore che può rialà.
‘O ciore è profumo che nasce d’ ‘o core
e c’ ‘o core può dà ‘a felicità.
Felice ‘o SIGNORE mannaie da lo cielo
‘a STELLA splendente: ‘a luce DIVINA.
E ammore e perdono vulette dunà
a tutte li figli:all’Umanità.

BEGA Natale 2004

‘O SUONNO ‘E NA MAMMA

M’è parso nu suonno!
Poco tiempo fa
tenennote strint’’o core
te devo ammore:
ll’ammore ‘e na mamma.

Scetannome ‘a stu suonno
‘e veco chiù doce
chist’uocchie tuoie:
so’ chine ‘e luce
d’ammore appasiunato….

E quanno m’he guardato,
tu, nun è guardato a me….
E’ stato nu suonno:
‘o suonno ‘e na mamma.

BEGA - giugno 1989 -

‘O DIVINO AMMORE

Tutto accumencia c’ ‘o tennere carezze
Mentre dint’ ‘a ll’uocchie se legge ll’allerezza.
Po… quelle sensazioni che dona ‘o vaso ardente
p’accumpagnà ll’ammore che, ‘mpruvvisamente,
trase dint’ ‘o core c’ ‘o scostumatezza,
scuteliannate ‘a pelle, lassannete ‘a priezza.

Sta cosa nun è cosa ‘e tutt’ ‘e juorne
Perciò nun è semplice o normale,
p’appriparà sto piatto c’ ‘o cuntorno
‘nce vonne duie ingredienti assai speciali:

Isso, molto gentile, chino ‘e attenzione,
appassiunato, ardente, carico ‘e passione;
piuttosto timido, avvote pure ‘mbranato
ca, pe l’assenza momentanea da ragione,
nun s’accorge ‘e rimanè spaisato
perdenne ‘a posa: ‘o piglio ‘e ‘nfanfarone.

Essa, sciore nascente, doce e lucente,
cu na vocca che spira tante suonne ardente;
duie uocchie ‘e niro che ‘a passione tegne,
pelle ‘e velluto, comme ‘e rocce d’ ‘e muntagne,
capille ca s’arravogliano dint’ ‘o viento
comme ‘e penziere dint’ ‘o sentimento.

Quanno ste duie se guardano dint’ ‘a ll’uocchie
‘o sango dint’ ‘e vene all’ave ‘a scossa;
‘e vocche s’accostano e tremmano ‘e ddenochie,
s’azzeccano abbracciannese cu na sola mossa.

Si pure tant’ ‘e cose non so pare
na cosa adda essere pe certa:
‘o core ‘e Isso ‘e Essa, comme ‘o mare,
adda sempe tenè ‘a porta aperta.

E’ na vita che j stongo ‘mpriatorio.
‘O core ‘e chella llà ha chiuse ‘e porte
lassanno ‘o mio dinto a nu murtorio.
Vurria sentì ‘e sunà nu pianofforte,
vurria putè cantà nu verso ‘ntiso,
vurria provà nu poco ‘e Paraviso.

BEGA - aprile 1988 -